Aggio visto 'int' a tutt' 'e terature

ppe truvà, pe na, cumbinazzïone,

na pezza d' 'a bbonanem' 'e vavone,

quacche vecchia sciammeria a ffrasche e sciure,

e arravugliarce dinto sti scritture,

pe putervene fà donazzïone,

facenno, mo nce vo', nu figurone

comme l'ha fatto 'on Grabbiele pure.

Ma, primm' 'e me, passaie 'o saponaro

e nun' aggio trovato 'o riest' 'e niente,

per cui me songo fatto 'o paro e sparo...

Don Ferdinà, vuie site ommo c'apprezza:

se volete, accettate stu presente:

io v' 'o dongo c' 'o core... e senza pezza!