276

Eres pura enbidia, non ha en el mundo tanta,

Con grand çelo que tienes, ome de ti se espanta;

Sy el tu amigo te dize fabla, ¡ya quánta

Tristeza é sospecha tu coraçón quebranta!

277El çelo syenpre nasçe de tu enbydia pura,

Teniendo qu' á tu amiga otro fabla en locura:

Por esto eres çeloso é triste con rrencura,

Ssyenpre coydas en çelos; de otro bien non as cura.

278Desque uvia el çelo en ty arraygar,

Ssospiros é corages quiérente afogar;

De ti mesmo nin de otro non te puedes pagar,

El coraçón te salta, nunca estás de vagar.

279

Con çelo é ssospecha á todos aborresçes,

Levántasles baraja, con çelo enfraquesçes,

Buscas malas contiendas, fallas lo que meresçes:

Contésçete á tí como en la rred á los peçes.

280Entras en la pelea, non puedes della salyr,

Estás fraco é syn fuerça, non puedes refertyr,

Nin la puedes vençer nin puedes ende foyr,

Te estorva tu pecado, fáçete ally moryr.

281Por la envidia Cayn á su hermano Abel

Matólo, porqué yaze dentro en Mongibel;

Jacob á Esaú por la envidia dél,

Ffurtól' la bendiçión, porqué fué rrebtado dél.

282Ffué por la enbydia mala traydo Jhesuxristo,

Dios verdadero é ome, fijo de Dios muy quisto,

Por enbydia fué preso é muerto é conquisto:

En ty non es un byen nin fallado nin visto.

283

Cada día los omes por cobdiçia porfían,

Con envidia é çelo omes é bestias lydian:

Adoquier que tu seas, los çelos ally crían,

La enbydia los parte, enbidiosos los crían.

284Porque tien' tu veçino más trigo que tú paja,

Con tu mucha envidia levántasle baraja:

Anssy te acaesçe, por le levar ventaja,

Como con los paveznos contesçió a la graja.