Los que la ley avemos

De Xristos á guardar

De su muerte devemos

Dolernos é acordar.

1060

Cuentan las proficias

Lo que sse ov' á cunplir:

Primero Jeremías

Cóm' avia de venir;

Diz' luego Ysayas

Que avya de parir

La Virgen, que sabemos

Ssanta María estar.

1061

Diz' otra proffeçía

De aquella vieja ley

Que'l Cordero morría

E salvaría la grey,

Daniel ya lo desía

Por Xristos nuestro Rey

En David lo leemos,

Segunt el mi cuydar.

1062

Com' profeçías disen

E que ya se cunplió,

Vino en Santa Virgen

E de Virgen nasçió,

Al que todos bendiçen,

Por nos todos morió,

Dios é ome, que vemos

En el santo altar.

1063

Por salvar fué venido

El lynage umanal,

Ffué de Judas vendido

Por muy poco cabdal,

Fué preso é ferido

De judíos muy mal,

Este Dios, en que creemos,

Fuéronlo açotar.

1064

En su faz escopieron,

Del çielo claridat,

Espinas le pusieron

De mucha crueldat,

En la cruz lo sobieron,

Non avían piadat,

D'estas llagas tomemos

Dolor é grand pessar.

1065Con clavos l' enclavaron

Las manos é pies dél,

La su set abrebaron

Con vinagre é con fiel,

Las llagas, que l' llagaron,

Son más dulçes que miel

Á los que en él tenemos

Esperança syn par.

1066

En cruz fué por nos muerto,

Ferido é llagado,

E después fué abierto

D' ascona su costado:

Por estas llagas, çierto,

Es el mundo salvado.

Á los qu' en él creemos,

El nos quiera ssalvar.