Don Federico Seccia, ca c'è stato,

se fa pregà nu poco, pe pparlà.

— Io, ncapo a vuie, v'avessa raccontà

tutt' 'o fatto? Seh! Seh! Ce so' arrivato! —

'O cafè, sano sano, s'è arrucchiato

attuorno 'o tavolino, p' aspettà.

Isso allumm' 'o sicario, e doppo fa:

— Bravo! È 'o quarto ca caccio e ch'è crepato...

Diece mane se stènneno: — Fumate...

Don Federico sceglie, tocca 'mponta,

tasteïa mmiezo, 'e morette allinïate,

po dice: All'una vado al Municipio..

Aggia fa priesto.. 'A bbavarese è pronta?

E allora principiammo dal principio...