Erano frate... eppure se menajeno

cumm'a dduie cane, ll'uno nfaccia all'ato...

Ognuno 'e lloro forte, ognuno armato,

cchiù e quatto o cinque vote s'afferrajeno...

Nfin'a cche 'e gente attuorno accumminciajeno,

comme s'usa 'e fa spisso int' 'o triato:

—Basta! Basta! — Ma che! chill'era sciato

perduto, ca cchiù forte s'angappajeno.

— Ma nun ce sta nu guardio, n'ispettore!

strillava quaccheduno – questa scossa

mo ci rovina tutte le signore!

E tutto 'nzieme, dint'o serra serra,

se sente: Sta venenno 'a Croce Rossa!

Ce sta nu galantomo muorto 'nterra!...