Como dize Salamo é dize la verdat:

Que las cosas del mundo todas son vanidat,

Todas son pasaderas, vanse con la hedat,

Ssalvo amor de Dios, todas sson lyviandat.

106Yo, desque vi la dueña partida é mudada,

Diz': "Querer do non me quieren, ffaría una nada:

Rresponder do non llaman, es vanidat provada".

Partíme de su pleito, pues de mí es rredrada.

107Sabe Dios qu' á esta dueña é á quantas yo vy

Sienpre quise guardarlas é sienpre las serví;

Ssy servir non las pude, nunca las deserví:

De dueña mesurada sienpre bien escreví.

108Muy villano sería é muy torpe pajés,

Sy de la muger noble dixiese cosa rrefés;

Ca en muger loçana, fermosa e cortés

Todo el bien del mundo é todo plazer es.

109

Ssy Dios, quando formó el ome, entendiera

Que era mala cosa la muger, non la diera

Al ome por conpaña nin dél non la feziera;

Ssy para bien non fuera, tan noble non saliera.

110

Ssy ome á la muger non la quisiesse bien,

Non ternía tantos presos el amor quantos tien':

Por santo nin por santa que seya, non sé quién

Non cobdiçie conpaña, sy solo se mantién'.

111

Una fabla lo dize, que vos digo agora:

Que "una ave sola nin bien canta, nin llora";

El mástel syn la vela non puede estar tod' ora.

Nin las verças se crían atan bien sin la noria.

112E yo, como estava solo, syn conpañía,

Codiçiava tener lo que otro para sy tenía:

Puse el ojo en otra non santa; más sentía:

Yo cruyziava por ella; otro l' avíe valdía.

113E porque non podía con ella ansí fablar,

Puse por menssajero, coydando recabdar,

A un mi conpanero; sópom' el clavo echar:

Él comió la vianda, á mí fazie rumiar.

114Ffiz' con el grand pessar esta troba caçurra;

La dueña que la oyere, por ella non me aburra:

Ca devríen me dezir neçio más que bestia burra,

Sy de tan grand escarnio yo non trobase burla.