Del qu' olvyda la muger te diré la fazaña:

Sy vieres que es burla, dyme otra tan maña.

Era don Pitas Pajas un pyntor de Bretaña;

Casó con muger moça, pagávas' de conpaña.

475

Antes del mes cunplido dixo él: "Nostra dona,

"Yo volo yr á Frandes, portaré muyta dona".—

Ella diz': "Monsener, andés en ora bona;

"Non olvidés casa vostra nin la mia presona".—

476

Dixol' don Pitas Payas: "Doña de fermosura,

"Yo volo fer en vos una bona fygura,

"Porque seades guardada de toda altra locura".—

Ella diz': "Monssener, fazet vuestra mesura".—

477Pyntol' so el onbligo un pequeno cordero.

Fuese don Pytas Pajas á ser novo mercadero.

Tardó allá dos anos, muncho fué tardinero,

Façías' le á la dona un mes año entero.

478Como era la moça nuevamente casada,

Avíe con su marido fecha poca morada;

Tomó un entendedor é pobló la posada,

Desfízos' el cordero, que dél non fynca nada.

479

Quando ella oyó que venía el pyntor,

Muy de priessa enbió por el entendedor;

Díxole que le pyntase, como podiesse mejor,

En aquel logar mesmo un cordero menor.

480Pyntóle con la gran priessa un eguado carnero

Conplido de cabeça, con todo su apero;

Luego en ese día vino el menssajero:

Que ya don Pytas Pajas desta venía çertero.

481Quando fué el pyntor ya de Frandes venido,

Ffué de la su muger con desdén resçebido;

Desque en el Palaçio ya con ella estido,

La señal que l' feziera non la echó en olvido.

482Dixo don Pitas Pajas: "Madona, sy vos plaz'

"Mostratme la figura é ¡aiam' buen solaz!"—

Diz' la muger: "Monseñer, vos mesmo la catat:

"Fey y ardidamente todo lo que vollaz".—

483Cató don Pitas Pajas el sobredicho lugar,

E vydo grand carnero con armas de prestar.

"¿Cómo, madona, es esto ó cómo pode estar,

"Que yo pynté corder, é trobo este manjar?"—

484Como en este fecho es syenpre la muger

Sotil é malsabyda, diz': "¿Cómo, monsseñer,

"En dos anos petid corder non se fer carner?

"Veniésedes tenplano: trobaríades corder".—

485Por ende te castiga, non dexes lo que pides:

Non seas Pitas Pajas, para otro non errides.

Con dezires fermosos á la muger conbydes:

Desque telo prometa, guarda non lo olvides.

486Pedro levanta la lyebre é la mueve del covil,

Non la sygue nin la toma, faz' como caçador vyl;

Otro Pedro que la sygue é la corre más sotil,

Tómala; esto contesçe á caçadores mill.

487Dyz' la muger entre dientes: "Otro Pedro es aqueste.

"Más garçón é más ardit, que l' primero que ameste:

"El primero apost déste non vale más que un feste,

"Con aqueste é por éste faré yo, ¡sy Dios me preste!"

488Otrosí quando vyeres á quien usa con ella,

Quier sea suyo ó non, fáblale por amor della;

Sy podieres, dal' algo, non le ayas querella:

Ca estas cosas pueden á la muger traella.

489Por byen poquilla cosa del tu aver, que l' dyeres,

Servirt' ha lealmente, fará lo que quisieres,

Fará por los dineros todo quanto pidieres:

Que poco ó que mucho, dal' cadaque podieres".