Día de Casimodo iglesias é altares

Vy llena de alegrías, de bodas é de cantares:

Avían grande fiesta é fazían yantares,

Andan de boda en boda clérigos é juglares.

1316Los que ante eran solos, son agora casados;

Veyalos de dueñas estar aconpañados:

Puñé cómo oviese de tales gasajados,

Ca el ome, que es solo, tiene munchos cuydados.

1317

Ffyz' llamar Trotaconventos, la mi vieja sabida:

Presta é plaçentera de grado fué venida;

Rrogele que me catase alguna tal garrida,

Que solo é syn conpaña era penada vida.

1318Díxome que conosçía una byuda loçana,

Muy rrica é byen moça é con mucha ufana:

«Açipreste, amad ésta, yo iré allá mañana,

»E si esta rrecabdamos, nuestra obra non es vana.»—

1319Con la mi vejezuela enbiéle ya qué,

Con ella estas cántigas, que vos aquí robré;

Ella non la erró é yo non le pequé.

Si poco end' trabajé, muy poco end' saqué.

1320Assaz fizo mi vieja quanto ella fazer pudo;

Mas non pudo trabar, atar, nin dar un nudo:

Tornó á mí muy triste é con coraçón agudo;

Diz': «Do non te quieren mucho, non vayas á menudo.»—