1508Por olvidar la cuyta, tristesa é pessar,

Rrogué á la mi vieja que me quisiese casar.

Fabló con una mora; non la quiso escuchar:

Ella fiso buen seso, yo fiz' mucho cantar.

1509Dixo Trotaconventos á la mora por mi:

«¡Ya amiga, ya amiga! ¿quánto há que non vos vy?

»Non es quien vervos pueda: ¿Cómo sodes ansy?

»Salúdavos amor nuevo.» Diz' la mora: «Lesnedri».

1510»Fija, mucho vos saluda uno que es de Alcalá,

»Enbíavos una çoda con este alvalá.

»El Criador es convusco, que mucho desto tal há:

»Tomatlo, fija señora.» Diz' la mora: «Legualá!»

1511«Fija, ¡sí el Criador vos dé paz con salud!

»Non gelo desdeñedes, pues más traer non pud',

»Aducho bueno adugo, fabladme á laúd,

»Non vaya de vos tan sola.» Diz' la mora: «¡Ascut!»—

1512Desque vido la vieja, que non rrecabdava y,

Diz': «Quanto vos he dicho, bien atanto perdí:

»Pues ál non me desides, quiérome partir d' aquí.»—

Cabeçeó la mora é dixo: «¡Amxy, amxy!—