L'ommo è fatto accussì, voi mi capite:

basta ca vede 'o ppoco d' a vunnella,

se sente ca l' avòta 'a cerevella,

e ne facite chello ca vulite.

E fossero 'e cchiù dotte, 'e cchiù struite,

a storia, frate caro, è sempe chella:

mettitele vicino na faccella

e po' voglio sapè che mme dicite...

Tu si Dante Alighiere? Si nu Ddio?

Quanno 'a capa t' avota per amore,

diviente 'o sì Nisciuno, figlio mio...

E può scoprì l'America, che fa?

Si 'a femmena te dice: Nonzignore..

Colombo e bbuono,... 'a tuorne a cummiglià!